香港新浪網MySinaBlog 精選話題工具
新浪網 - MySinaBlog
我都係估估吓
sssmiles | 30th Sep 2008 | 一般 | (261 Reads)

毎年既立春八字,我都會略作分析一下.好多時都係大方向,同埋搵重點.

以下純係個人既解釋 (老作嚟既嘢,唔好上心)

2008年立春八字,

戊子年,甲寅月,甲戍日,甲戍時

1 股市大冧,經濟下滑

天干三甲木剋年支戊土偏財,以及日支時支戍土偏財. 甲木通根月支寅木,有子水生.土雖然係旺,但係無嘢保護. 即係無火嚟生土.咁強既木咪就會劈瓜d土咯.土係偏財,呢度係代表股市. 股市點會唔冧. (個人認為,股市,唔一定係屬金或者屬水架)

2 石油年中飛升,年底最低 (以前既文章講過喇)

3 有大地產機構或大佬,因沽空而大破敗.

大地產機構或大佬,咪係戊土咯.戊土既下面係子水. 子水係戊土既財,子水去生寅木,寅木係比肩,比肩會去剋財,咪即係沽空.成個既意思係,大戶暗地裏沽空,而甲木回剋自己,哈哈,自己攞嚟衰. 咁,大戶有幾多個呢?

4 超級大地震

同第一條一樣解釋,將股市改為土地就係啦.

 

其實,以上4項預測,對於我嚟講,係無乜特別,亦都唔係好滿意.其實,好多人都會測到.真係架.我對自己唔滿意既地方係樓下既嘢 ~ ~

舉例-測地震

1點會知幾時地震? 邊一日,邊一個時辰.

2係邊度地震? 有幾個地方地震? 地點個名呢? 9月中就有一日內同時幾個地方地震,點估得到?死未!

3 地震強度有幾大? 幾多級?

4 死幾多人?

5 地震維持幾耐?

6 地震後遺症?

7 地震損失有幾多?

8…..

9 ….

 我係問題好多既人,一個問題,我就諗好多好多嘢出嚟. 所以,睇到出面d書,有人話自己幾犀利. 測到少少嘢之麻,有乜咁特別. 我成日對自己質疑,預測左既嘢,修正又修正好多好多次. 講真,我都仲係未夠級數. 估中先自同人講,估唔中梗唔會講出嚟.錯既嘢多到講唔晒. 係咪好瘀呢.

踩人先要踩自己,仲要狠狠大力踩!

留言(0) | 引用(0)

論2009年運程書 (一)
sssmiles | 28th Sep 2008 | 一般 | (1268 Reads)

2009年立春八字,己丑年,丙寅月,庚辰日,丙子時

由中秋節左右到近幾日,市面上大大話話都出左10本左右既運程書. 當然,我好快就走去咪吓. 以下既大師,如果你地有睇,會知我講緊邊個.

 1 肥嘟嘟大師 : 立春八字係身弱財旺. 身弱有印可任財. (舊年佢話身旺財旺,我就己經唔認同. 本人觀點,今年八字財星弱就真.)

2 查查 : 土重金埋,不利地產金融. (我睇唔到點樣埋金喎,土略旺就真.)

3 一個頂十幾個既曠世奇才 : 今年水旺,利金融同埋航運股.成交活躍. 個市上半年波動大,下半年可能會向下. (舊年佢有篇2008年既預測,我本來寫好左,不過,後來諗吓無謂再踩得咁大力,後來成篇嘢del左. 今年佢都係麻麻地咋. 真係唔知原來金融原來屬水喎.好多大師都話屬金.奇!)

4 硬鋤北先生 : 今年己丑,咪係”幾醜”咯,好多嘢都唔掂. (真係好佩服佢,只係用流年干支就講到咁犀利. 咁戊辰年係咪無喱神氣呀,戊戍年係咪個個都好冒失呀,己未年呢,係米台灣”幾米”既大發年呀 .哈,哈,哈,哈,無嘢講.)

5 偉哥 : 偏財得令,有財. 殺印相生.地產較好,國家對香港有助. 仲有子水傷官受克,不利航運業. (呀偉哥,子水你都話受傷咯,偏財來源弱,年支丑合,月干洩木,日支耗財.偏財當令都係無乜用)

講住咁多先.呀成成既料有好多,我要好好消化係個腦到先.另有一位用梅花易,寫得D字好密好難睇.仲有鐵餅先生……  財經大佬所寫既,可以唔駛睇.望一眼都晒時間.

 :

以下係我既無知分析

1 子水無金生,死水嚟嫁炸.水點會旺.仲有,子水同辰土,未必可半合水局. 辰土可以係庫,不過,亦都可以係墓. 好多人一見到子辰一齊,就以為一定就會半合.唔該諗清楚.呢個好多大師都錯. 如果呢個辰係墓,咁子水係咪會入墓呢? 咁,你地話寅才又會唔會旺? 咁,幾時係庫,幾時係墓,唔……..  

2 用斗數嚟睇立春日,命宮坐太陽,巨門係寅宮. 財帛宮無主星,只有輔星文昌,右弼同埋鈴星;而財帛對宮有文曲忌對照. 咁財帛宮弱,對福德宮見忌星嚟沖,咁,點可以話財旺呢? 八字同埋斗數都好夾.

3 未完架………

 

舊年2008年既八字.我最初睇既時候,就即時斷估左4樣嘢. (馬後炮,認叻梗係要爭住嚟認)

1 股市大冧,經濟下滑

2 石油年中飛升,年底最低

3 有大地產機構或大佬,因沽空而大破敗.

4 超級大地震

  
留言(6) | 引用(0)

寫blog心情 - 超標啦
sssmiles | 27th Sep 2008 | 一般 | (256 Reads)

以前,都唔係鍾意寫嘢.由6月12日至8月5號,約31篇文章,己是超出我的想像.

那兩個月所寫既文章,已超過我以前10年內所寫.超標喇.即係話,以前一年都無寫過一篇嘢.你地話,寫blog係咪對我好大挑戰呢.

最初學人寫blog,係想過下癮,人地寫咪我又寫咪得囉.起碼試過係乜東東.

不過,寫寫吓,虛榮心就愈嚟愈大,成日卦住睇排行榜.睇收看率.

後嚟,諗諗吓,無謂寫,好晒時間,真係好晒時間.唔知為乜.都過完癮咯,做過想做既嘢咯,都算係咁啦.

有段時間,完全唔理,係諗住關門大吉.不過心魔又起,久不久都睇吓有無人嚟我個blog望兩眼.吓,居然都仲有人嚟關顧一眼.多謝.

諗番起所寫既嘢,其中 “大師的批章”, 係我最花時間. 首先,我用左個篇原先資料既舊曆,用斗數起盤,發覺好有問題喎, 以為自己發現董大師連起盤最基本都錯,執到寶啦.咁就用左一日嚟用錯既盤諗問題. 之後,發覺唔對路,原來佢係新曆嚟先至真.哈哈,佢既新曆唔用亞拉伯數目字,而係用中文正寫.我蠢咯.

起番啱既盤,就慢慢推算.都用左一日有多既時間,推敲又推敲,終於都出世啦.個篇嘢,其實可以打好長,大約可以分4-5篇嘢嚟出都得,不過,唔想寫得太細緻,刪吓刪吓都仲係覺得幾長.算啦,照出. 希望唔好悶親人.   

仲有,擺上網既時候,d料成日打斜,又唔齊,好難睇.del左又再放上去都好幾次,個晚真係有d火. (即係話用左約3-4日既時間,先至出到貨,真係屎.)

不過,出左嚟之後,發現收看率低,都幾失望.吓,搞左幾日,都無乜人睇.

其實,仲有一d文章,都幾花時間架.你地估吓啦.

我”笨”唔係人地一出手就寫到會飛過隻,而係一個主題,先放係個腦到係咁諗,等到成篇嘢差唔多ok,就開始打出嚟.真係幾耐架. 哈哈.
留言(2) | 引用(0)

一流分析員
sssmiles | 17th Sep 2008 | 一般 | (205 Reads)

(呢篇嘢唔會講術數嘢,股市我都係好渣,吹吓水)

今次實行踩過界,去踩吓財經界d猛人,真係睇睇睇唔過眼喇!

第1件,登．登．登．櫈．- 係佢喇,前睡銀既手直分色師 -肉鬆先生

舊年11月,佢話恒指個市會去到36000,甚至可以去到42000喎.真係禍左.

幾個月後,修正話合理值係28000,點知又衰左.

最近9月頭又話,20000點可以入貨.好嘢,連中三元.瓜埋添! 恭喜你.攞第一.隻手真係可以曲都拗番直.前手直分色師,實至名歸.

第2件孖寶嚟既. 塵永鹿同埋角C治.(三文治就食得多,角C治就真係未食過)

3-4個月前,仍係時時聽到佢地講,基本因素係無變到.10年前都係咁講,10年後又係咁講.講左=無講. 過多幾年,實啱.好利害.唔怪得咁襟撈.

佢地亦都話過 “依家唔講熊市定牛市,只係講升市同跌市” 其實係唔識睇. 最近已經講緊話係熊市,叫人唔好亂買貨.哈哈. 

講住少少先,其實仲有好多.10個8個都走唔甩.有d真係笑死你. 仲有米國佬財團,超級掛牌大老千,真係有排講呀. 金融海嘯,自食其果累街坊! 

以下既數據係好大概. (我既分析可能錯到離奇)

1睇番恒指幅圖,高位舊年32000,到今年三個低位,約20500-21000左右.第三次破位既話,一睇就知big pan .超大三角形,量度跌幅會好驚人.

2 如果舊年23000係合理值. 咁8/17,由19387忽然殺上去,直上32000.超合理約9000點,反過嚟睇,23000-9000,咪係14000左右.超升就會超跌. (好粗略咁計)

3 以PE計,8倍恒指約14000-15000 (都係好粗略咁計)

4以波浪理論計,依家個市,行緊熊三(C浪)既3浪,仲有4浪反彈,去埋最後5浪下跌. 熊一跌左大約32000-20500=11500點.如熊一等於熊三,大約會跌到26500-11500=15000或以下. 不過,唔會低過11000. 信報一位大師,話個市可以去到9千零點都得,我唔贊同

舊年年尾到依家,我既睇法未變過,15000點或樓下.

(之前,3至4個星期前,有其他數浪專家話係5浪新升浪,牛市重臨,點知又衰左,呀許x光,你教吓你d徒弟啦. 你本’泡沫爆破了’,都係麻麻地,唔識既就唔知你點樣錯,仲有果d所謂水星逆行,倒果為因,收番起佢啦.)個市點睇.今個月仲係跌. 多多得罪好多人,不過我所講既,又多數係事實噃.

1依家個市,唔係純係基本因素,係個市場上,有好多衍生工具,槓桿式買賣令到相關無形資產,比實質股票大好多倍.咁,即係話就算基本因素好到會飛,個市上落都可以好利害. 大果個話事 !!!

2 1945年起,美國太平左60年,巴菲特買股當然係賺多過蝕,長揸容易發達.不過,依家,資訊咁流通,好容易一齊起哄.世界市場一環扣一環. 好多嘢都變左. 長揸仲得唔得? 如果,股神係日本1990年之後投資,由約40000點跌到依家約11000,你估會點?

   
留言(0) | 引用(0)

超超超超超-級級級-金融大海嘯
sssmiles | 16th Sep 2008 | 一般 | (276 Reads)

發緊夢既大師:

蘇x峰,佢係9月14號下午7:30既亞洲電視一個節目話 “依家唔係熊市,只不過係跌番舊年2萬多點起飛既時候啫.” 佢仲有個睇市既秘技,逢單數年,年頭升,年尾跌.雙數年,年尾升,年頭跌. 呢個真係偉大既發現,可以去攞諾貝爾經濟奬. 真係曠世奇才呀.你地信唔信. 我信呀,佢傻架麻!

好可憐,隔離個條友(主持人),讀完大學,再可能去讀埋個分析師之類既牌(斷估),自己唔用腦,走去問埋d唔識嘢既人. 呀大師,你咪話過今年戊午月會係股市最差既月份, 哈哈……..

仲有位叫李x明大師,佢舊年個本運程書,話8月8日嚟緊兩個月,個市好到你唔信.(自己可以去摷吓料睇番) 我係我篇-(術數-炒-估)-都講過,希望金克木制比肩,個市會起番D,仲話好擔心呢兩個月,官殺剋甲,好唔安樂 .睇吓全世界,台灣風災,美國亦係風災. 泰國政治動盪. 9月11日,有數處同日地震,中國三鹿奶粉…..真係單單都係堅嘢,仲有格老吉亞同俄羅斯打交,個日係8/8庚辰日,仲有…. 

今年立春八字,戊子年,甲寅月,甲戍日,甲戍時.

之前講過,戊午月,油價會開始跌,跌到癸亥月.開頭啱左,結果仲未知.

甲木遇上庚申辛西月,金克木.天干甲木無人幫,會比人劈瓜.3條甲木,即係話有3間大嘢唔掂.

年支子水救月柱寅,呢間係貝爾斯登.

雷曼-甲木為震,為雷,另有兩甲係比肩,即--雷曼兄弟

美林-唔駛講啦,個名有兩碌木,都講左咯.

AIG-A係第一,甲亦係第一.I係一碌木,而G發音同甲音相似.哎,無眼睇咯.唔知點講. (我真係希望估唔中,否則,全世界都high嘢,好多人D老本都會無左,無眼睇)

個市點睇?

我係舊年年底己經講左個市會大冧.哈哈,無一個人彩我.真係無一個彩我.

出年個八字,一睇又係好唔安樂.近幾日逛街睇書,包括x點居士,麥x玲,林x雄等既09年運程書.無一個講到我擔心既嘢.好明顯啫,點解無人提.

(呢篇嘢本來好長,為免讀者瞌眼瞓,我簡化左)

留言(0) | 引用(0)

YO！犯太歲,駛乜驚呀！
sssmiles | 15th Sep 2008 | 一般 | (333 Reads)

犯太歲,年年都有好多人講既話題. 以下犯上,係咪咁驚呢? 我就覺得唔係囉.

太歲當道喎,即係屬於你既年份當值喎,做班長,係最惡至啱,駛乜驚? 輪唔到你既,就話無你份.真係唔明要擔心D乜.

假如你係今年戊子年出世, 有朝一日到左馬年,即係同午火年相沖. 子去沖午,係水克火,驚乜嘢呢. 不過,如果係遇到辰戍丑未年,就要小心D,因為土克水呀麻.

出年,就係己丑年,土克合水.相合喎,係咪好盞鬼呢. 哈,好易變鬼呀.食硬你喎,走得去邊.(假如用年支計數係啱既話)

用番日元嚟計,甲日出世既話,犯太歲,就應該係甲去克戊土年,甲克戊土,咪就係我去克財,真係開心都嚟唔切.(身弱者就要小心) 咁,就唔怕犯多幾次.

真係犯太歲,係講果年係庚年,庚克木,係自己比人劈, 係太歲嚟犯你. 你犯太歲,係自己去克財.唔駛擔心.

犯太歲,最開心既梗係D廟竹公,運程書老細,同埋風水師…….,哈哈,有錢搵.老親係咁嚟,D錢就繼續嚟.

唔知以前D人係點去化太歲.有六十個咁多,幾時有架? 係一齊嚟,定係唔同時代嚟架. 根本就唔識佢地,一D瓜葛都無,到左某某年,咁就比人話犯太歲,幾無姑.　

邊個教話去廟到拜吓就得架? 跛既點去拜呀? BB呢?

假如: 我屋企隻狗仔Dolly係牛年出世,出年駛唔駛去拜吓? 抑或係龍年或者狗年先至去化太歲呀? 仲有我好鍚既喵喵,佢係羊年出世,咁點搞先至啱? 鄺小姐既汪汪呀Cash,唔知屬咩嘢生肖?

 特首Donald Tsang, 係猴年出世,今年鼠年,係三合局,無犯太歲,應該係政通人和先至啱.不過今年佢係好頭痕,有咩嘢好既洗頭水介紹比佢用. 衣家真係好多個政府,都係比人地以下犯上,呢D真係犯太歲.

我經常都有個問題, 犯太歲到底係犯乜嘢太歲? 係幾時,幾耐,何事,何地,同埋何人? 唔好老作話某某今年會破財,就話係犯太歲. 有邊個係一年裏頭係唔會破吓財架? 同拖友鬧吓交都會卦? 就算化左太歲,就係咪所有嘢都順順利利. (係,無錯! 人地個荷包就順順利利.) 比左錢,但之後又唔妥,有無得回水?

YO,犯太歲,駛乜驚呀.年年有得犯,即係話你仲未瓜,無得犯,你就弊喇!
留言(1) | 引用(0)