你地有無見過,有人用神數推算世界及中港台既運程呢? (如果有以前既,最好話我知,比個可以學吓嘢) 既然叫得做鐵板,應該推世界運程係準到得人驚果隻. 印象中,無囉! 如果係咁勁,全地球既人都應詃去留意,不過就失望居多.

我話過玄學界最多老千,有50%咁多,咁神數呢瓣,就超過50%,約到90%左右.(絶對係個人偏見啦,.)

有次睇電視,我見到有位所謂神數專家,一開口就知係無乜料到.個名都係唔好講啦.佢就連d八字都學藝未精呀.

80-90年代,紫微斗數在港開始興起,而鐵板數都係咁旺.但係,試諗諗,神數包含咁多種術數,剩係識兩三樣都好勁啦. 仲有,果陣時,紫微斗數啱啱開始,有幾多人識,唔通玩親神數既都識.剩係起盤都唔知點唔點?  果時用電腦起盤都未幾流行卦!未有上網呢家嘢,連pda都未有喎.仲有仲有,七政四餘起盤仲難,依家有電腦就好d. 咁,用邏輯推理,你話以前d人用神數係點推命.唔怪之得,有d人一推運就渣到離奇!

係書局,見到有三日學鐵板之類既書兩册, 無乜用架.我望兩眼就唔睇.

術數只不過係分析既嘢嚟之麻,有乜嘢咁神奇.你話我知,睇住個表一層一層去查書,咁樣就叫批命.中間無野學過,只係查表,其實乜都唔識.唔怪得之叫 ”傻仔數”.

你係第一個覆我既blog友,以為無人睇,諗住要收檔添.

好啦,我又要比番小小心機去寫番d嘢.

曾經有一位前輩, 攞過佢既命書比我睇.我都唔知點解佢會比我睇.當時我係初初認識八字命理小初哥. 佢既命書有3份,全部都係用鐵板神數批既. 一份係董x節,一份係秦x石,而另外一份唔記得左,無乜印象. 佢同我講,頭兩份命書,都係有份量既人馬,不過,批佢某些年份既運程,就完全倒轉, 我當時就問,乜會唔同既咩?

而另外一位朋友,係一位同事. 佢地一家都好早移民左去”格甩底”, 之後返香港搵銀. 有一日,呢個同事同我講,話佢全家都有算命,都係搵呀董x節睇既. 佢講完之後,心情相當high. 我諗,梗係啦,收費唔平既噃. 有錢有面先至可以睇到架.

好奇心俱使下,我就去書局摷下書,不過睇唔明.之後丟低左.

其後,睇過一d文章,講鐵板小神童方x然,話佢十零歲就破解到神數既密碼,嘩!好犀利. 條氣唔順,人地都可以破解到,無理由我唔得.又再到處摷書睇過.都係諗唔通.

又過一排,唔知幾耐,睇到王x之對神數既批評,覺得幾有理. 於是,從新再檢討. 同時,自己又對術數了解多左; 反而對呢門嘢開始無乜好感.

另外,徐x琪,嫁比呀李四叔個仔,有人話佢旺老公.旺老公,係咪應該掉轉講至啱? 之後,佢生左個女後,又有人撲出嚟講,個B點富貴,一睇就係富貴相之類. 都係呀高x禧夠guts,佢所講既並唔係咁誇,有個句,講個句.都幾實在

                  xxx                           xxx

年頭,阿肥姐去逝, 之後,就有好多人攞佢既八字嚟分析.奇!!! 唔同既八字都可以講到飛咁.真係盲既開眼,啞既笑出聲,駝背既腰都拗得直. 係加拿大,有人同呀肥姐搵左6月1日紀念佢,叫”肥肥日” 佢個女欣宜話, “呀媽係農曆六月一日出生,唔係新曆.” 至於肥姐既出生年,好多人都用47年,亦有人用45年去批.

1945 己卯日

1946 甲戍日

1947 戊戌日

1948 癸已日

1949 丁亥日

林x雄,以前對佢印象一般.不過,後來睇過佢寫既書,包括玄空,八字,手面相等,全都係實戰經驗,我覺得相當好,而且受益不少.萬分萬分多謝. 比起坊間有D名家,佢地d作品,只可以睇吓,消磨時間,攞唔到入我既書櫃.有d仲會教壞人.

據傳聞,因為當時有位馬師傅唔肯教佢玄空,佢就自己睇書學玄空,學成之後仲係香港第一個教授玄空呢門學問既人.勁! 自學成才又一例.

另外,最深印象既就係,佢依家仲走去讀中醫.中醫都有陰陽五行架.佩服,佩服!

大師今年既運程書,基本同我睇既唔多(韜吓光先),不過,佢話身旺任財,我就唔

王x之,一位好前既前輩.最初學紫微斗數既時候,就係睇佢既書,同埋紫微楊既書.

以前,又係幾迷佢,不過,之後就無左feel.點解,佢講既嘢,全都係記憶癥狀既嘢,條文式多,有乜嘢星遇見乜嘢星,就有乜嘢現象.無乜分析.果陣時,學起盤都有排學.起完仲要慢慢查,揀d自己鍾意既嘢嚟睇呃自己.

睇過既書,只有一本有3個命例,資料甩漏,甚麼星沖起之類.依家,我可以拆解喇.佢既書,目前一本都無,睇過就算. 不過,佢對紫微斗數係香港既發展都有帶頭作用.

講開又講,近年有個自認係佢學生出書,搞到佢老人家快快出來拒認. 又係既,有料既話,駛乜周圍認親認戚. 我最唔鍾意d人掹人地車邊.無諗過自己會好過人地咩. 理得佢係中x派,龍門派,x同派,…….

王前輩既天,地,人盤,我其實唔係幾明? (遲d先至去深究). 如果紫微斗數要有天地人盤先至算到命,咁…. 照推論,八字,奇門,六壬,七政四餘,鐵版神數,係咪都要有天地人盤先至得.咁…. 台灣有好多高手都無講過,咁咪…………. (唔好怪我咁蠢既Logic.特別係前前輩果眾多高足,多多得罪)

不過,依家我就唔羡慕呢門術數,亦相信部份鐵板專家既功底都係麻麻.首先,來人先要答覆師傅既問題,當然係唔駛出聲,只不過翻幾頁紙啫,咁即係比左答案喇.

仲有,批命唔係即刻比你,要你等一排先至有.喂,會唔會係第二度請鎗架.等咁耐.

你睇吓依家仲有幾多神數高手係市場上呢.呃人係唔呃得幾耐.一係就己經發到豬頭,上左岸.

有朝一日,有人寫左個程式,d人就可以自己嚟玩,咁好多神數尃家咪要收檔.其實,神數話有12000條條文,甚至有人話佢有12萬條孤本.我都覺得都係無乜用.一個八字有成個百萬既組合(好多都係咁計,其實唔止),12萬條可以解釋得晒咩.而且,仲有攞住d書先至用得.算盤或者計數機都走唔甩.好麻煩啫.據聞神數包括八字,斗數,易卦,七政四餘……,我真係唔相信神數專家會通晒幾門術數.是彈一門好精既,都唔之有無,我真係好懷疑 

我見過一份批章,有一句  --“命得財星,可經商”.吓,咁就得咩,食傷生財,官殺護財駛唔駛? 咁行運條數仲計唔計落去呀?

仲有好多似是而非,又好文雅既語法.睇完都唔知講乜.仲有就係無菱兩可.

咁樣,你係咪好反對鐵板神數呢,又唔係喎.我相信佢既六親生肖程式有硏究價值.

亦都相信真有勁人.只不過我仲未見到.

呢個真系最犀利, ”佢話佢測既嘢,10次只容許自己錯1次” .我真係要誠心求佢收我為徒,徒孫都制.佢係邊個,新人王戴x珽.

個次,係無記節目,有人搵佢預測謀日既股價及恒指點樣? 之前,又話測恒指好犀利,後來又改口話係測足球叻.點之-----

佢話佢果d乜乜龍門派.人地問卦時,佢又話乜乜天移卦,天破卦之類,又話要俾時間佢靜一靜諗下嘢.乜話,火天大有卦,山天大畜卦,我就識啫.破軍星我都識,但係佢講果兩個卦名,真系聽都未聽過.我睇書都唔吵,都未見過.佢一就係無料到,一就係我見識少.無錯喇,一定係我讀得書少,唔好呃我.…….李小龍講既.

仲有,仲有,點解要俾時間佢諗諗,會唔會入房打電話問功課.識既,即刻揺卦咪得囉,搖六次之嘛.不過,如果唔熟,白手起卦都要花些時間. 又或者,可以用八字卦,紫斗卦都得.就算最差咪用電腦囉,無問題噃.

好可惜,佢既作品好少睇過.第日有時間再講過.

輪到輪到李x明大師,他己在術數界日子唔短.

早幾年,佢成日話香港五行忌火,要用水救火.最好就係用老鼠仔----迪土尼樂園.

點知,橋就佢俾,但風水就係蘇x峰去睇.蛋家雞見水無得食.

在下仍記得個開張八字 : 05年9月12日1:30左右.

八字如下: 乙西, 乙西, 己亥(日元), 辛未

天干食神制殺, 時辰辛未好緊要.但05年10月11月係丙丁月,之後,就係06,07丙丁年制食,而雙殺克日,唔怪得一開張就有問題,之後兩年是非多多.生意又唔好.仲有,出年09年己丑,丑未沖.唔知會發生咩嘢事.在下愚昧,咁多時間,點解唔搵個食神生財既八字呢.(不過,我估佢實話呢d係管理層問題嚟噃.)

撐得太遠喇,以前我都有睇李大師既作品,有d都有啟發性.有好多係日常生活例子,令我較為入腦.但近呢兩年,大師似乎有d退步.

另外,佢又話香港忌火,今年寅午戍火局股市有波動.哈,佢睇漏眼,乙卯月跌到呀媽都唔認得.卯戍化火呀老友.依家午月都算佢講得啱,戊土財比甲木克

佢講既無個樣,補個樣.係好有問題.唔係你缺乜嘢五行,就去補就得,有d愈補愈大鑊.唔識既人好容易領嘢.

至於,佢既功力,起碼都比好多人好.